葉楚航馬房自從於2013年馬季以69Win打敗告東尼，首度登上冠軍練馬師寶座後，由於兵力用得太盡，馬房一直處於回氣期，去到今季成績終於反彈，現時以30Win居練馬師榜第四位，季內「僥倖」贏五Win更係馬房招牌作，練馬功力明顯又上一層樓。

周日（25日）葉廐馬有一特色，就係除「蒜頭爺爺」季內贏過之外，其餘均未交代，第八場三班1000米「好客本色」近兩仗爭1400米力拼下只能入位未勝，反映馬房很想交代，但今次同日有三班1400米卻不報，反而縮程跑1000米直路賽，不過翻查季初於此程只敗給不敗灰馬「旺蝦王」入Q，相信馬房敢這樣部署必有一定把握。

第三場四班1400米「大運舞台」現時41分充滿競爭力，大前仗敢於嫌短谷草1200米落飛搏殺已係最佳証明，只得第三全因路程實太短，今次1400米屬射程範圍，但要小心係現只差一分可落五班，絕對係進可攻，退可守！