試諗吓，如果有日你返到屋企，先發現屋企俾人強拆咗，係幾咁徬徨無助。

今年4月喺藍奕邦屋企外築巢嘅喜鵲，喺藍奕邦力護「不遷不拆」之下，成功孵咗喜鵲BB，不過今日藍奕邦喺fb上載閉路電視片段，話個巢喺佢離港期間遭強拆，疑兇就是樓下的房客。藍奕邦憂慮，明年喜鵲回巢，會冇咗個安樂窩。

其實早喺藍奕邦發現喜鵲築巢嘅同時，樓下的房客已密集式向管理處同業主立案法團投訴，又搵過漁農自然護理署協助。當時漁農署話因為拆雀巢係違例，加上雀巢位於私人範圍，除非發現雀屍，否則係唔會干預或採取任何行動。

漁農署喺屋苑協助下，只曾於上月視察過一次。雖然表明不反對拆巢，但叮囑立案法團要做最後檢查；藍奕邦與立案法團有共識，待他返港才處理雀巢，最後業主立案法團未遵承諾。

藍奕邦回覆《蘋果》時稱：「香港有人幫我哋報咗警，但警方話唔會作出任何行動，因為唔係佢哋管轄範圍之內，叫我哋搵番漁農處。總之我冇收過消息，有任何人得到過任何特別許可證去從樓下拆巢。」

藍奕邦表示：「根據《野生動物保護條例》第170章第5條，任何人除按照特別許可證行事外，不得取去、移走、損害、銷毀或故意干擾任何受保護野生動物的巢或蛋。」換言之，樓下強拆呢個行為可能已經觸犯法例。

「撇開犯法，漁農署吩咐落的多一次最後檢查，未做。業主立案法團亦冇等我回港。如果真係仲有雀或蛋，拆者在破壞生命。OK，當巢真的『吉』了，那就代表冇雀，冇雀就無所謂的「禽流感」，為何一定要拆呢？為何不可以由它留下呢？難道一點大自然生態都不能容下？如果你間屋無人住是不是代表我也可以拆你間屋呢？」