【新增動新聞】
前財爺曾俊華近期復出金融界，噚日仲喺一個論壇對點評時下政壇現象，除咗嘲諷前特首梁振英「懷舊到要推廣華服」，亦暗斥建制派何君堯喺開會期間做facebook live、「做幼稚嘅鬼臉」令議會變得小學雞，話好懷念昔日議會紳士淑女議政！

向來鍾意開火嘅何君堯，畀鬍鬚曾公開奚落，又點會唔反擊？佢噚晚深夜喺fb撰文回應，題為「心黃盡露還是懵上心頭」，已經好有火藥味。何君堯先指聽鬍鬚批評有政客破壞制度同規矩，聽起上嚟以為批評嗰啲行為不檢議員，自不然抽水重提許智峯搶手機事件，點知，「噢！甚麼也不是！原來他指的是CY和我！真有點受寵若驚。」

繼而佢自辯話，估唔到喺立法會「扮演第四公權」，拍攝「倒（搗）亂議會過程」揭示「泛統醜態」係幼稚行動，然後竟然學人玩Fact Check，話鬍鬚曾在任財爺之時曾批評泛民「盡情破壞」，而家竟然「反舌相奚批評那些撥亂反正的人是破壞者」，質疑「究竟是他變得糊塗，還是他本質就是如此呢？」，又話好在佢做唔到特首，否則香港穩定繁榮危矣。

八方都特別睇返，鬍鬚曾2015年確實寫過網誌，引用「努力興建，盡情破壞，彼此也在捱」歌詞談議會文化，但佢當時係針對「拉布戰」，希望議員善用時間唔好「拉布」，唔係解構緊議會嘅「幼稚」文化，而支持拉布都可以係紳士同淑女，千祈唔好錯fo噃。