黃百鳴早前對《十年》拎最佳電影，稱50萬成本拍嘅電影唔應該攞獎，連金像獎前主席兼導演張同祖都睇唔過眼，雖然二人份屬好友，不過祖哥都唔認同黃百鳴用錢嚟做最高評分嘅標準，祖哥噚日向《蘋果》稱第一屆金像獎最佳電影《父子情》製作成本亦唔貴，叫對方唔好「亂噏」，又叫對方試下拍《反十年》、《建港偉業》，睇下有冇人睇？(新聞連結： http://bit.ly/1oHmKoq )

撞正今日係黃百鳴70歲生日，佢嘅心情冇受祖哥批論所影響，佢噚晚同袁潔瑩、湯寶如、李蕙敏及關寶慧等好朋友敍舊，湯寶如今日凌晨1點幾，貼出合照，留言：「祝生日快樂，身體健康!」而另一張相中仲見有一個扮「爆肌黃百鳴」嘅Q版公仔。