薛凱琪(Fiona)、黃真真導演、連詩雅、譚玉瑛、邵音音、黎芷珊等，噚晚喺銅鑼灣出席電影《閨蜜2之單挑越南黑幫》首映禮，電影公司安排三個猛男上台，叫Fiona同黃真真拉開猛男嘅恤衫褸，露出勁爆胸肌，黃真真拍打猛男胸肌，笑話：「仲勁過我。」不過Fiona個樣就好尷尬。

一啲嘉賓演員都被邀上台講下同邊個圈中友好係閨蜜，邵音音就拎咗張黑白相畀黃真真睇，問認唔認到係邊個？黃真真睇嚟睇去都認唔出，音音姐即大聲話：「你老母呀！」原來音音姐閨蜜係黃真真嘅媽咪同婆婆，然後又話：「當年黃真真喺紐約返港拍戲，我免費做佢助手，有次要返內地開工，經過皇崗，我俾人偷咗銀包，佢即刻叫人一齊去垃圾站搵，最終搵返回鄉證同身份證，我真係好佩服佢。」

講到同邵音音嘅交情，黃真真話細細個識得音音姐：「佢成日同我媽咪、婆婆打牌，我返港拍戲想訪問佢嘅成長，佢都有一口答應，細個當佢auntie。估唔到會拎啲相出嚟。」Fiona笑話：「最搞笑係你唔認得阿媽囉！如果係我媽，我一定認得出。」黃真真解釋話：「我未見過我媽結婚相。」

同場嘅連詩雅同黎紀君係閨蜜，詩雅話大家喺好多方面都好相似，一樣都係路痴：「遇上感情問題唔開心，一個電話佢即刻出來嚟。」問到有冇試過鍾意同一個男仔？詩雅話：「我鍾意成熟、沉實、嚴肅比較悶嘅男人，佢鍾意高大運動陽光型男，都唔同。」有冇去過鴨店？詩雅話：「梗係冇去過，之前有朋友喺LA開婚前派對，請咗個脫衣男，我都同朋友講，如果我有機會結婚，婚前派對唔使請脫衣男，我唔會興奮，見到只會尷尬。」

精選娛聞，喺晒《娛果》
http://fb.com/appledailyent