黃美棋、江海迦（AGA）同黃慘盈今日喺觀塘出席手錶店Daniel Wellington宣傳活動，黃美棋特別對男裝手錶有興趣，不斷研究櫥窗入面嘅男裝手錶，佢話男友喜歡儲手錶，呢次可以睇埋聖誕禮物俾對方，不過佢笑言希望男友送情侶錶：「其實我哋有好多嘢都係情侶裝，鞋、衫、袋、錶都有一對嘅，不過多幾款仲好。」黃美棋都儲咗好多手錶，但太愛錫收藏品而唔捨得經常戴:「我驚整花隻錶，有次我搭飛機，落機發現唔知點樣整花咗錶面好肉痛。」

AGA特別喜歡收藏古董手錶，喺唔同場合配戴唔同款色襯衫，現時家中已有十數隻：「我好鍾意皮帶古董手錶，去世界各地都會去古董店搜羅，有一隻啡皮帶錶有50年歷史，我以前做空姐時最愛帶住，覺得好襯套制服。搵到鍾意嘅手錶唔易，如果遇到心頭好，就算好貴都可能買，實唔會有抵抗力。」佢指今次活動嘅手錶自己都喜歡，簡約又有風格。

更多娛聞，喺晒《娛果》
http://fb.com/appledailyent