陳琪上個月誕下細仔胡澔錕（Jayden），眨下眼細仔滿月，陳琪同胡諾言打算喺出年1月21日為囝囝Jayden喺迪士尼酒店擺百日宴，聽講話已經請咗好多朋友同家庭一齊去玩。

而今日呢，就係胡家二小姐胡芷悠（Jacey）嘅4歲生日，咁啱Jacey唔使返學，媽咪陳琪就安排同個女一齊去拍廣告，陳琪話：「係呀！咁啱唔使返學，Jacey同我一齊去拍咗個關於香港主題樂園聖誕廣告，佢最初都有啲怕醜，叫佢講嘢有啲細聲，佢話自己斯文喎！嚇死我，拍完一個shot，又話要補妝，真係俾佢笑死。」

生日嘅Jacey仲喺拍攝現場慶祝生日，一班工作人員知道Jacey生日，就幫佢安排咗一個生日蛋糕，仲o氹到佢不知幾開心。

生日前一晚，爸爸胡諾言就叫埋爺爺嫲嫲、公公婆婆，三代同堂一齊為Jacey慶祝生日，又買咗Jacey最喜歡嘅公主城堡蛋糕，而Jacey就好開心咁喺蛋糕前唱生日歌送給自己，非常可愛。