尾場三班1200米，潘頓再騎上次輸畀「帝聖好好」做二奶之方廐馬「喜喜寶」，結果人馬一齊反敗為勝。「喜喜寶」上仗12檔，今場內移至5檔，結果大熱補中順利開齋。連同第三場贏「龍華太旨」在內，造就潘頓同方嘉柏呢對最佳戰友，雙雙食尾糊兼合作起孖。
相反「帝聖好好」上次贏完加咗分，兼由3檔今次轉排12檔，最終後上不及輸番畀「喜喜寶」，呢場開質新實力馬翻版Q，竟有60倍之多，不過兩駒名次卻互調，季軍則落喺由蔡明紹騎番之「幸運日」身上。潘頓對上三個賽日都缺陣，一次去咗日本騎超級騎師大賽，另外兩次則停賽，一下子畀雷神彈甩。呢晚雷神起孖，幸好潘頓亦唔執輸，但仍落後雷神12場。