各位曼聯球迷，仲記唔記得過去一季英超煞科戰主場贏水晶宮2:0場波，有位燙射金球得手後擺出打電話慶祝pose嘅新星？原來呢球唔只係佢首個曼聯一隊入球，亦好有可能係最後一個！英冠球隊普雷斯頓周五宣佈，免費簽入21歲嘅夏路普（Josh Harrop），雙方簽約4年，合約由7月3日正式生效，但由於夏路普未滿24歲，普雷斯頓經商討後需要向曼聯賠償一筆未有透露嘅費用。

夏路普早喺2012年加盟曼聯青年軍，呢位中前場多面手備受學院領隊畢特賞識，今夏完約後亦獲得曼聯開出新約，但佢表示為咗更多上陣機會決定毅然接受新挑戰：「我而家21歲，對自己充滿信心，但需要喺常規上陣證明實力，呢樣嘢係曼聯並冇保證，就算佢哋向我開出新合約，但上陣時間相當有限，我喺呢個年紀唔可以冒呢個風險。」夏路普年紀輕輕就咁識諗，話唔定他日大放異采，強勢回歸紅魔呢？