紅灣醜聞縱深時空發展，扯埋二十年前嘅愉景灣補地價問題！原來愉景灣初初發展嘅目標，係度假酒店，點知一個偷龍轉鳳，變咗做地產，當時嘅殖民地政府公然放水，毋須佢補地價！
二十年前血淚一幕，未來十年，隨時會在特區重演！愉景灣本來講好係做酒店，咁都可以變身做地產，咁西九龍文娛藝術中心，同埋大嶼山發展大計，一個話做博物館、歌劇院，一個話做主題公園水療度假村，將來咪又係一樣，落咗搭，隨時變咗做地產？
使唔使補地價？睇吓紅灣半島就知嘞！𠵱家紅灣就拆樓重建，佢話冇轉變到土地用途，以前係住宅，以後係豪宅，一樣有個「宅」字，一個仙都唔補，咁你鬍鬚孫又吹得脹咩？有種嘅咪對簿上訴庭囉！