「樂壇已死」相信大家都聽到麻木，現今歌手要在樂壇尋求生存空間絕對不易，近年資訊發達，予歌手多個發揮平台空間，同時又帶來不少苛刻留言或難堪抨擊，兩位年過三十的男人吳浩康與洪卓立，正正在這股抨擊洪流中力爭上游，為的是對音樂熱誠及不想辜負家人的支持。

同是新秀出身，沉默寡言的洪立卓（Ken）與粗狂野孩子吳浩康（Deep）在性格及外型上天壤之別，而這對黑白配將於下月11日假麥花臣場館舉行兩人首次合作騷《他說他的故事演唱會》。日前兩人於銅鑼灣接受《蘋果》專訪。共事同一間公司超過十一年，期間公司經歷幾個時期變化，亦有安排歌手們作不同合作演出機會，但兩人卻一直擦身而過未有合作，Deep指兩人心裡面都一直想合作，他說：「如果早幾年做可能無乜嘢想講，依家我哋都30出頭，就有啲嘢可以走埋一齊去講。」而旁邊的Ken就深深吸氣講出一句：「終於唔使再同鍾舒漫。」Deep笑說：「我唔嫌棄（同鍾舒漫合作）。」

兩個大男人合作開騷，Ken覺得相比起跟女歌手合作，在音樂上可以做更多變化，可以玩更多以往未有機會做到的事。演唱上兩人會互唱對方歌曲，Deep說：「我心裏有一批歌佢(Ken)唔會唱番，所以我會攞去唱，我唱自己嘅歌會有少少改編，但唱佢嗰啲歌就會用番原來編曲，我好想透過今次個騷介紹呢個人裡面一啲好嘢畀大家，我覺得大家仲未聽夠佢嘅歌。」聽到此番兄弟情心底話，Ken由心底講出一句「感動」。Ken會挑選一些有故事性歌曲來演繹，他說：「有一啲歌可能歌迷想聽到自己偶像唱番，咁嗰啲歌我就會留番畀佢唱。」兩人指今次個騷絕對沒有花巧，純粹做好音樂令觀眾得到共鳴。

過往演藝旅程上，兩人都遇過不少是是非非，甚至在網絡上抨擊，經已在網上死後復活無數次的洪卓立，於多年來無數留言中，令他印象最深的是？他說：「有一個台灣人喺我首歌Youtube下留言話『唱得幾好聽，呢個係邊位？』，跟住有個人用廣東話留言話『嗰個係死人，香港無人聽佢唱歌』。呢句說話一路印喺腦海，呢句難聽過所有嘢，係摧毀我同幕後人所有努力心思，唔好聽或唔啱口味，可以唔聽，但唔好因為一個玩笑或一個題目，連聽都唔聽就去否定所有人努力。」面對這些留言，Ken坦言無能為力，唯有是繼續做好自己。

相反Deep承認自己好多抨擊都不是無緣無故發生，始終自己曾經犯錯，但最令他接受不到留言是指「Deep洗女人錢。」他說：「我自己都做咗一段時間，好嘅冇乜幾多做，發生自己身上咁多事，令人睇我角度有少少唔同，最緊要睇自己點去消化，最重要自己點睇自己，我只會同自己講將唱歌、演戲兩樣嘢做好，其他人唔係事必要欣賞我。」

Ken承受無限死訊假消息外，跟女友湯怡一段情亦不時被狙擊，他說：「有人話我哋咁耐都唔結婚，一定係男仔有問題，唔好嫁窮鬼啦。平時我都好少覆，嗰次我忍唔住就覆『你好似識我咁』，好奇怪，好多人見唔到就覺得係冇做，如果我日日將做乜工擺上網，佢哋都唔會理唔會留意，所以唯有硬食，好彩係兩個人嘅事，另一半知道就算。」對於莫名其妙無限死，Ken都有反思是否在工作上得罪人，甚至連洪媽媽也如此質問，但Ken坦言工作上沒有任何攻擊性，百思不得其解。

面對工作及網上抨擊壓力，有甚麼動力推動兩位大男人繼續堅持，Ken說：「係家人，由好唔支持、反對、擔心到依家叫有少少驕傲，唔係個仔有咩成就。我媽未生我同阿哥之前想生兩個女，然後去參加香港小姐，因為我媽咪係校花，我爸爸都幾靚仔，所以諗住有勝算，不過依家掹車邊都叫明星仔，我媽咪心諗都算係星媽，另外當然係我好鍾意唱歌，唔做呢行可以做邊行，因為如果行行都咁困難，點解唔去做（自己想做行業）。」Deep曾經投入保險業，亦被人質問為何毅然轉行從歌手轉做保險，Deep說：「我有啲嘢未做好，想好頭好尾，開始時做得好好，到中間就自己破壞，我好鍾意表演、好鍾意演戲唱歌同鍾意掌聲、舞台，因為娛樂圈生活好被動，我都要搵其他收入來源去支持自己唱歌。」

於別人眼中看似冇工作而網上直播唱歌及打機的兩人，其實背後付出幾多又有誰知，Deep說：「我網上直播前要跑嚟跑去買嘢，之後又要花時間去覆留言，我搵兩份工做去支持，冇收入又邊有資源去做網上直播，冇飯食又點生活，只係有心想做好。」同樣Ken亦指網上直播打機沒有甚麼收入之餘，同時間要投資添置電腦，他說：「要做好多準備先做到打機直播，可能我屋企部電腦係平時人o地屋企三部電腦。」面對種種困難，兩人堅持憑信念去做好自己，在任何可能中尋找機會，默默以實際行動繼續演藝旅程。

採訪：馬建華
攝影：陳俊強
攝錄：馮嘉銘

髮型：Terry Yeung/@Corner（Ken）、Moe@Fifth（Deep）
化妝：木子維納（Ken）、Keikei Ng（Deep）
服飾：WTDAF（Ken）
場地：RedMR紅人派對