武漢肺炎疫情未見曙光，全港餐飲服務業24萬打工仔飯碗危危乎，專家提議酒吧、食肆暫停營業減少人口聚集，有食肆就在政府實施前陸續主動暫停營業。其中位於佐敦的茶餐廳澳洲牛奶公司（澳牛）決定自本周四（26日）起休市3星期，直到4月16日才重新啟市，以為顧客和員工着想，減少病毒傳播。《蘋果》記者於下午時段到達澳牛，雖然已沒有大排長龍的景況，但店內仍然有不少食客光顧，食客對於澳牛的措施紛紛表示支持。

食客陳小姐今日與朋友經過附近一帶，在網上看到澳牛將停業3星期，故決定光顧。她指有鑑於香港疫症開始呈嚴重趨勢，認為澳牛暫停營業3星期是好事，「而家嘅人流喺疫情嚟講係安心咗，因為無咁逼、無咁多人排隊，如果嚟到要排隊，個風險都會大咗」。然而對於店內仍有多人光顧會否擔心時，陳小姐笑言「咁快啲食完囉」。陳小姐支持餐廳食肆應暫時停業一段時間，「因為到呢一刻都未搵到解決疫情嘅方法，傳播率亦都高，所以我覺得停得嘅話都停囉，因為你唔會知下一刻身邊有咩人有肺炎，都擔心呢樣嘢」。

食客贊成餐廳外賣為主 限人數光顧

食客Vivian間中都會光顧澳牛，對於澳牛暫停營業3星期表示理解，「因為（病毒）真係太犀利，佢都係為大家好啫」。對於店內仍多食客光顧，Vivian坦言不算太擔心，「比起以前已經少咗好多人，啱啱都唔使排隊，入面都唔係太逼」。對於有建議餐廳食肆應暫停營業一段時間，Vivian指「全部暫停就唔OK，可以改外賣為主，或者開少啲，限人數，如果50人嘅場就只可以有25人，唔好太滿座就好少少」。

食客凌先生及黃先生並非澳牛常客，兩人均認為澳牛暫時停業是好的措施，「依家疫情嚴重，如果澳牛關咗，大家咪可以去少一個地方囉，可以安全少少」。他們認為澳牛算是人氣旺盛的餐廳，「啱啱都會有啲擔心，所以都係拿拿聲食完就走。如果真係有人有事，都會好易傳染到，見佢都幾旺」，亦認為澳牛屬象徵性較強的餐廳，「我覺得佢都係一個好好嘅代表去同全行講，不如閉門去提高一下個衞生，始終呢個咁嚴峻嘅情況下，大家都係少出門為妙」。

另外，大坑「Pheromone Steak House」在facebook專頁宣佈，由今日起休業14天，觀察本港疫情發展。今日及以後14天的預訂將安排在5、6月優先補上，並會逐一聯絡已訂座的客人。

店方認為，自3月19日至昨日，本港武漢肺炎新增確診個案超過100宗，足證本港疫情前景嚴峻，未來日子的社區感染情況人人自危。該店認為有社會責任暫停服務，以保障員工及食客安全，又鼓勵市民盡量留在家中，避免不必要外出及社交活動，並期待與食客在疫情穩定後再相聚舉杯。

另一位於長沙灣的黃店「王孖記果子」昨晚亦在fb專頁發帖，指鑑於疫情持續嚴重，但「政府繼續唔封關，手帶人周街走」，為保障員工健康和減低醫護壓力，決定今日起至28日暫停營業。

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架