過去幾年間，離開新聞主播崗位嘅一個接一個，當中包括現年32歲、效力大台11年嘅鄭萃雯（Karen）。Karen今年7月辭職後，曾經轉往職業訓練局做公關，但係原來上月，佢已經轉咗去一間醫療公關公司，繼續做採訪及主播嘅工作。

喺大台任職11年，由低做起，或多或少都會有啲血淚史，問到Karen除咗離職時喊住同戰友道別，剛入行時有冇因為被「恰」到流眼淚？佢笑言：「都冇嘅，係都係自己做錯啫！」Karen憶述：「第一年返工做實習，一星期4日返工，3日返學，返工返朝早5點，我要3點起身去旺角坐車，以前覺得好辛苦，o依家覺得好難忘，成件事好青春同熱血。」

電視台一向是非多，Karen認為有人嘅地方就會有是非，即使一間茶餐廳或者簡單如一間三人公司都一樣會有，佢嘅態度就係唔理，就算聽到都唔會講。早於Karen離開主播枱嘅人有伍家謙、方健儀、周嘉儀、黃紫盈等等，現時各人有各人發展，問到Karen勇敢轉型會唔會同呢幾位同行外闖，仲發展得唔錯有關？Karen坦言有影響，好似報體育出身嘅伍家謙，o依家都仲仍然做緊同體育資訊有關嘅工作，佢認為係好事，亦都好希望自己會有好成績。

至於有人批評主播專業形象變質，變得明星化，Karen認為：「可以做到幾專業要慢慢模索，但自己會循正途去行，希望大家唔好覺得我玩，因為我唔係sell靚女同青春。」講到明星化，Karen笑謂：「或者呢行係好奇妙，喺電視出現就會俾人話係明星，但我覺得係咪公眾人物都好，做人就應該行得正企得正，有信心就得，網上批評一定有。」

化妝&髮型：Gary Cheng@Helpmakeup

更多娛聞，喺晒《娛果》
http://fb.com/appledailyent