《明報》執行總編輯姜國元上周突然以「節流」為由被辭退,《明報》幾個專欄作家接連開天窗抗議。喺特首梁振英治下,連建制中人講多兩句唔啱聽嘅說話,都被噤聲。
話說人稱「西環契仔」嘅立法會議員謝偉俊(Paul),早前喺地區掛橫額,寫住「香港須改,特首要變」,點變呢佢就冇講明,不過香港人主觀意願緊係變咗個特首啦,點知有傳「一男子」連呢句話都容不下,結果一陣大風由西環吹來,結果咪要換橫額囉。
唔知阿Paul係咪唔忿氣,今日Facebook竟然學《明報》專欄作家開天窗?佢張個人資料相移除,留返個「天窗」,而封面相片就寫「特首在Banner在特首變Banner變」、「編者按:特首不變謝偉俊Banner不變」。
八方問過阿Paul,佢話呢排興有不滿就要開天窗,要表達吓意見。佢話呢張banner確有地區樁腳覺得行得太前,所以都係收一收先,但佢團隊度咗咁多橋,出唔到都有意見,咪用呢個方式表達吓:「我性格係唔會放棄爭取空間,要喺鳥籠內爭取擴闊空間。」