怕負累伊健 寧願遲婚
GiGi做大娛樂家 不再好勝
蘋果日報 2004/12/26 00:00
一套舞台劇《大娛樂家》，除了令梁詠琪（GiGi）得到寶貴的舞台經驗外，還令她不再着重名利。對於感情，GiGi透露不急於與伊健結婚，怕負累愛侶的她坦言在單親家庭長大，難免會有陰影。
踏入年尾，又是派發樂壇成績表的季節，不知身為唱作人的梁詠琪有沒有信心在頒獎禮中分一杯羹，甚至力爭最受歡迎女歌手呢？GiGi日前接受記者訪問時說：「其實我覺得今年都幾全面，年頭拍咗兩套戲，出咗一張國語碟，一張精選同一張廣東碟，又接咗六、七個廣告，做咗一個舞台劇，做咗好多嘢。其實我性格唔可以悶，所以乜嘢都做啲。」
GiGi年尾才推出廣東碟，對於爭奪獎項好像比較蝕底，GiGi卻另有一套看法，她說：「我一啲都唔覺蝕底，重賺咗㖭，我要搵咁多圈中人幫我寫歌已經唔容易，所以籌備時間好耐，呢張碟我唔想馬馬虎虎咁做，我唱歌唔係為攞獎，可能有啲人會放晒時間喺音樂度，所以成績會好啲，但係我唔得囉，我一向都鍾意多啲嘗試。」GiGi有沒有想過問鼎最受歡迎女歌手呢？她坦言：「有就梗係開心，不過我就算攞唔到都好戥人開心。」
GiGi最近演出舞台劇《大娛樂家》，獲益良多，她說：「以前做訪問成日話喺台上表演好有滿足感，今次我真真正正領會到乜嘢係滿足感，因為我感受到同劇嘅演員係真正追求藝術，唔係為咗爭名逐利，佢哋默默表演畀一班真正欣賞同支持舞台劇嘅人睇。
「講真，睇舞台劇嘅人唔會好多，唔會好似喺紅館咁做畀萬幾人睇，舞台劇個場好細，但佢哋依然好落力去做，保持水準，唔係咁易做到，有啲人可能會放棄，覺得嘥時間，不如搵錢好過，不過我今次做完之後覺得好值得，打從心底嘅滿足，唔係錢可以買到。」
除了追求滿足感外，演出舞台劇還令GiGi領略到做人不一定要追逐名利，她說：「其實呢兩、三年我都係咁諗，做人唔一定要爭第一，以前好辛苦，可能成日要做啲自己唔鍾意嘅嘢，因為大氣候嘅關係，不停同人比較，根本生活就唔係為咗自己，只係為咗叻畀人睇。」
記者取笑GiGi是否已搵夠錢，才不需再爭逐名利，她解釋：「唔係呢個原因，咁當然安定屋企人都好緊要，我記得初出道，媽咪重要出嚟做嘢，環境唔係太好。不過咁𠵱家過咗呢個階段，就唔可以停留喺度，𠵱家嘅人生觀係最緊要開心同滿足囉。」
GiGi人緣甚佳，故此其新碟邀得不少好友拔刀相助。
深閨的GiGi自言最愛留在家，因感覺最舒服。
GiGi曾被成敗得失困擾，但現在凡事以開心為出發點。