早前馬會選出12匹超新星，練馬師苗禮德旗下「新強勇駿」是其中之一（短途/一哩馬組別），此馬上季三歲出道共四戰，全跑1000米直路賽，初出受嚴重擠碰兼受困下落第，接着三仗全勝，次次彈甩對手。

不過踏入四歲的「新強勇駿」，完全未見出賽，已缺陣七個月。終於是日（2日）沙田賽事才作季內首戰，角逐第六場三班1000米，當然令人留意。

「新強勇駿」久休復出，難免令人有疑慮，翻查其傷患報告，今年5月初獲第三捷後，足部出現問題，在5月中經全身麻醉，一對膝部接受手術。

到了11月中，此駒又被馬會獸醫發現右前腿不良於行，一對膝部發現新碎骨及嚴重退化，睇完這些紀錄後，真係嚇親人，究竟今次信唔信這匹超新星呢？

「新強勇駿」馬主倫國偉解釋，5月時此馬做手術是取走碎骨，之後就俾佢唞耐少少，今季復操及10月試閘都唔見有太大問題，但之後於上月中見到愛駒的傷患報告，自己都嚇了一跳。

為此他問過苗禮德，苗禮德就話「新強勇駿」冇問題，而倫國偉亦表示，如果馬匹真係有問題，獸醫都應該不會批准牠出賽。

「新強勇駿」四戰同程直路賽得三冠，確實甚有星味，加上苗禮德來港從練19年，只差一Win就可達600場大關，如果此馬真係冇事，可交出上季贏馬時水準，當可令苗禮德踏入新里程碑。