川崎前鋒終於唔使做阿二。周六上演日本職業聯賽最終回，賽前落後兩分嘅川崎前鋒成功後上，5:0大破大宮松鼠，力壓鹿島鹿角封王。

川崎前鋒自從喺05年升班日聯，曾經喺2006、08同09年三次喺聯賽屈居亞軍，佢哋喺今季亦喺日聯盃決賽飲恨，成日做阿二認真冇癮，到今日終於苦盡甘來。

前鋒煞科戰前33戰69分，落後鹿角兩分，由於得失球差佔優，今場波主場迎戰已經篤定降班嘅大宮松鼠，要贏波加上另一邊廂鹿角作客磐田山葉失分，先可以贏得冠軍。相反鹿角蟬聯嘅條件就簡單得多，贏波的話就唔需要理會前鋒戰果，靠自己贏冠軍。

前鋒場波好快已經冇懸念，開賽一分鐘就由阿部浩之先開紀錄，之後完半場前由小林悠拉開比數，後者剛重返日本國家隊，喺下半場再入兩球完成帽子戲法，加上長谷川龍也喺補時再入一球，助前鋒主場5:0大勝松鼠。

鹿角作客磐田，就越踢越緊湊。雖然磐田冇嘢爭但依然充滿鬥志，冇放軟手腳畀鹿角任攻。鹿角唔係冇埋門機會，但前鋒韋法臣李安度同金崎夢生都先後浪費黃金機會，結果一直入唔到波，0:0和局收場宣告衛冕失敗。

小林悠雙喜臨門，唔單止助前鋒封王，仲後上贏埋神射手殊榮。佢喺今場波連入三球，今季日聯累積23球，力壓杉本健勇（22球）同興梠慎三（20球）。

降班形勢方面，大宮松鼠同新潟天鵝喺煞科戰前已經提早宣告護級失敗，到今日決出最後一支降球隊。雖然甲府風林喺主場1:0小勝仙台維加泰，不過由於競爭對手清水心跳都贏波，甲府下季日乙見。

--------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM