杜如風今日喺中環出席CENTRAL CENTRAL x FUNGOLIA期間限定店開幕，佢同拍檔Calvin創辦呢個品牌已經兩年，一直主打網上生意，今次進駐中環，主要係想讓顧客見到實物，摸到「唔呃人」嘅質地，杜如風表示：「呢間舖唔使租金，但暫時做一個月，如果做得好，就做到終老為止，做個租霸。」想唔想開舖？佢話：「成日都有諗，但未諗到好嘅地段而租金可以低啲嘅地方，所以未敢扑搥去一個咁大嘅投資度。」

至於杜如風嘅緋聞男友黃又南亦有現身，黃又南話：「影張新相啦，次次都出嗰張，人哋會好悶，其實我一直好支持佢呢個品牌。」杜如風笑住指：「佢係咁問我攞衫，3個碼都話啱身，真係日防夜防，家賊難防，佢今日嚟，最主要係我哋最初被傳緋聞係2007年。」今日嚟慶祝？杜如風繼續笑住話：「傳架咋！不過由今日正式開始。」之後黃又南先正正經經解釋：「因為我搞緊太陽眼鏡，佢就搞T恤，大家可以合作，遲啲會一齊推出一系列產品。」杜如風好鬼馬咁話：「如果好賣的話，我哋會結婚，到時早啲到。」

此外，問到杜如風有冇計劃再拍攝旅遊節目﹖杜如風話：「如果日本肯離開我嘅話，我都願意離開佢，其實我會再去日本拍。」由於去年底杜如風因為斷咗膝頭哥嘅十字韌帶，要做接駁手術，所以呢個計劃要推遲，佢話：「因為我隻腳仲未好番晒，醫生叫我唔好做激烈運動，再斷就BYE BYE，我寧願抖耐啲，我諗9月前都OK。」