莫雷拉呢頭跑完「步步友」，周三晚又如常谷戰披甲，最關注嘅第一個，梗係三駒委以重任嘅阿John蔡約翰，同樣緊張就仲有Danny沈集成及副練丁冠豪；上次佢哋隻「創意寶」交由雷神新過檔，即以四個幾馬位拉住開齋。Danny對換咗人即脫胎換骨嘖嘖稱奇之餘，且強調雷神真係能人所不能，但講到尾證明到馬本身能力，丁仔就鬆一口氣。事關馬主陸生棟係丁仔早年剛掛靴後，轉做許怡副練時識落至今，而「創意寶」係丁仔經手買入，即使只係幾十萬港紙，但一路認為價廉物美，如今幫老友贏到，就算只係區區五班頭馬，都已經好過唔少幾百萬都贏唔到族群，咁今期升班再下一城，係原班人馬嘅最大心願！