側田前晚一連兩場演唱會噚晚喺紅館開鑼，佢全晚嘅衫都係有頂帽，換咗幾套衫，仲同觀眾講話：「呢個騷紀錄咗12年以嚟嘅三段過程，由最初好好彩，好運到好開心。」

喺第一部份，側田唱咗好多舊歌，去到第二部份嘅時候，側田係有少少sad，因為嗰陣係迷失時期：「音樂上有重覆感覺，係為咗市場作歌，其實呢個起點係錯，應該從心寫歌，唔應該計算，自己跟住無靈感去咗北京，抖咗三年返嚟，o依家refresh。」佢仲叫觀眾唔好喊。演唱會尾段，側田一口氣唱咗好多快歌，台上面仲有12個女舞蹈員，不停咁摸佢，揭起佢啲衫，仲一度摸佢下體，但係側田就用手遮住自己。

噚晚嘅嘉賓係容祖兒，當側田唱到《越唱越強》嘅時候，祖兒就升上台，觀眾反應都好熱烈，祖兒唱完歌，就問側田點解請佢做嘉賓：「我又唔係同你好熟，連飯都未食過。」側田就即刻解釋話：「我一向當你係女神，仲收藏你嘅海報，一向都好欣賞祖兒，你係一個Superstar。」

祖兒聽到側田話貼自己海報喺天花板，佢即刻問：「用嚟做咩？」但係側田竟然話話：「我真係好羨慕師兄(劉浩龍)！」搞到祖兒超尷尬：「畀你過咗一棟！不如我講吓點解會應承做側田嘅嘉賓，如果有一日我開唱片公司，我第一個就會簽側田，佢係一個多功能歌手，又跳到舞、唱到歌、寫到歌，仲可以慳埋整頭髮錢，我都好榮幸做到你嘉賓！」跟住佢哋就合唱《十六號愛人》。

更多娛聞，喺晒《娛果》
http://fb.com/appledailyent