人在職場，總有啲時候想用「是非當人情」，快速打好同其他同事嘅關係。亦有啲時候面對是是非非，心裡半信半疑。又有啲時候自己不幸成為是非嘅主角，被人講東講西，領教到同事嘅「創作力量同幻想」。

好多人工作多年，講是非變成一種習慣，甚至變成了嗜好。漸漸，辦公室內大家嘅對話除咗公事，就只有是非。

歸納工作多年嘅經驗，對於職場是非，我有以下體會：

- 幾可肯定，講是非係一種病，而且係傳染病。起初得一個人講，後尾成班人一齊講。

- 辦公室內，pantry、影印機旁都係最容易滋生是非嘅地方。

- 講是非其實都有分工：有人製造是非；有人傳播是非；有人搬弄是非……亦有人同時分飾以上三角。

- 有時，lunch time被迫聽人講是非，其實仲攰過做嘢。

- 面對愛講是非嘅人，你愈唔問佢，佢愈想講你聽。

- 請記得，每次講人是非，其實等於話畀人知你有幾八。

- 有人OT為工作，有人OT講是非。

- 如果有人將同一件八卦事重複話你知，亦代表呢件事已經有好多人知。因為，佢已經唔記得有無講過畀你聽。

- 以前，細聲講大聲笑係一班人講是非嘅特徵。而家講是非嘅特徵係，你發現有一個同事嘅WhatsApp群組無你份。

- 一個人嘅偏見可以透過講是非而傳播。如果多人被感染，偏見就會變成主流意見，而嗰位同事亦可稱為KOL。

- 好多人辭職係為咗遠離是非，但其實佢哋只係由一個是非圈，跳到另一個是非圈。

- 是非不在乎你聽幾多，只在乎你相信幾多。

所以，是非只有兩種：一、別人講的是非；二、自己判斷的是與非。

專欄作者簡介：
我做Marketing
由Michael及Derek兩位marketer創立的媽劇停平台。撰寫市場及職場文章。著有《我做媽劇停》及《暖男之道》。

Facebook專頁：
https://www.facebook.com/iDoMarketingHK/

發掘更多身邊的小城故事，請LIKE 蘋地 Facebook Page，並設定為「搶先看」： https://www.fb.com/appledailyland