維記的歸屬感|傭仔
傭仔地區消息蘋地空中飛傭專欄
墨爾本training嘅第一日,初到貴境,有個澳洲同事嚟咗training center搵我哋,佢仲預備咗一人一包佢親自包裝嘅糖果,每包糖個袋上面仲貼咗個貼紙,寫住「Welcome to Virgin」。
雖然只係一份小禮物,但正所謂「物輕情義重」,一個人預備15包,盡見心思。呢個小小貼紙上面嘅「Welcome to Virgin」都令我諗起:有咩原因可以令到一個小小員工對呢間公司咁有歸屬感,用自己去代表一間公司,去歡迎我哋?
小傭子我大學係讀廣告設計,三年讀書生涯成日都要study唔同公司嘅品牌建立(branding),自從嚟咗維珍之後,真心覺得維珍嘅branding足以可以做大學group project嘅case study。
首先,等我解釋下,其實我而家身處嘅維珍澳洲航空(Virgin Australia)係維珍集團(Virgin Group)旗下嘅其中一間公司。維珍集團本身有好多間公司,除咗航空公司之外,仲有好多唔同嘅業務,例如:電台、酒、healthcare等等……
而維珍澳洲航空,係一間成立咗18年、喺澳洲第二大嘅航空公司。2011年,維記進行咗一次品牌形象重建。由2011年5月開始,你會見到佢嘅所有宣傳嘅色系主要都係用粉紅色同紫色,顏色夠哂sharp之餘,而粉紅色同紫色正正就係佢套新制服嘅顏色(Corporate Colour),成件事係非常之match。另外,當你去睇佢嘅廣告,無論係電視、海報,甚至係training時候用嘅powerpoint同埋教學短片,都唔難發現用嚟用去都係嗰兩三隻字體(Corporate Fonts),根據我觀察,其中一隻係幼體嘅Gotham,呢隻字體用喺飛機上,加上簡約嘅機艙設計,盡顯elegance。喺呢啲branding guidelines下,唔會每樣嘢都唔同style、一時一樣;相反,所有印刷品、宣傳品,內內外外都比人一種好統一、好stylish嘅感覺。
正正係因為一個咁認真、咁細緻嘅品牌形象,每一個員工,只要加入呢間公司,都會好proud of自己係公司嘅一份子、好proud咁話比人知自己係做維珍,畢竟維珍畀人嘅形象係幾咁型(例如:Virgin Atlantic嘅制服係由British fashion designer Vivienne Westwood設計),所以每個員工都好願意去代表維珍呢間公司。
當然,咁樣講好似講到branding凌駕一切咁。事實上,作為一間航空公司,仲有好多嘢去令一個員工有歸屬感,例如工作文化、員工關係、福利等等。但無可否認嘅係,如果一個品牌公眾形象係好嘅時候,員工都會引以為傲,好樂意去成為公司嘅一份子。而呢樣嘢,都係我嚟到維珍交流之後好深深感受到嘅。
作為一個廣告設計嘅人,去run《空中飛傭 The Flying Maid》呢個Facebook專頁嘅時候,我都有擺到一啲branding嘅概念(例如顏色、字體),唔知大家有冇留意到呢?某程度上,維珍呢個交流,唔單止帶咗畀我作為空少唔同嘅飛行經歷,仲upgrade咗我嘅design sense,我好滿意!
專欄作者簡介:
傭仔
做過廣告、設計、插畫,而家係香港茄子航空嘅一名空少,喺維記澳洲航空交流中。2016年曾出版人生第一本繪本《空少傭乜易》,夢想係成為一個少女系漫畫家。用文字同插畫,同您分享喺飛機上面工作嘅點滴。
Facebook專頁:空中飛傭 The Flying Maid
www.facebook.com/theflyingmaid
發掘更多身邊的小城故事,請LIKE 蘋地Facebook Page,並設定為「搶先看」: https://fb.com/appledailyland