股評人陳永陸(陸叔)原來同搵緊白武士救亡嘅亞洲電視好有淵源,陸叔𠵱家咁出名,都係因為亞視財經記者喺一九九○年底開始搵佢評論股市,之後越來越多傳媒搵佢講股,令佢曝光率越來越高,陸叔笑言:「係亞視捧紅我㗎。」
陸叔近年一直以獨立股評人身份主持電台財經節目,佢早期評論股市嘅時候,就係喺大福證券(現為海通國際,665)。陸叔憶述,當年亞視財經記者走上去大福寫字樓搵佢講股,令佢開始有人氣。
二○○一年,麥嘉、黃霑與羅家英幫亞視做清談節目《三個光頭佬》,陸叔都係其中一集嘅嘉賓。陸叔仲記得錄影當日,喺化妝間第一次見到黃霑,對方一開口就一輪三字經,不過當然唔係鬧陸叔喇,呢個只係黃霑打招呼方式,好友善㗎。
既然陸叔對亞視咁有感情,佢人脈咁廣,亞視執行董事葉家寶不防考慮搵陸叔幫吓手,話唔定介紹到幾條大水喉畀亞視喎,諗諗佢喇。