對於零售業嚟講，女人錢可能好易賺，但喺speed dating呢行，要賺女人錢真係一啲都唔容易！因為佢哋嘅擇偶條件永遠都係水蛇春咁長，而當中大部份都係強人所難。就講康仔一個fresh grad客仔Annie吖，人仔細細鼻扁扁，偏偏眼角就高過珠穆朗瑪峰……

「我想識啲年紀廿中到廿尾嘅男仔。」

「冇問題吖！」

「要事業有成嘅！」

「要幾有成呢？」

「月入5至7萬左右。」

「……係。」

「有banker㗎呵？」

「……er，要睇睇。」

「應該有嘅，你哋搵吓啦！佢哋咁忙，冇時間識女仔㗎，一定有單身banker嘅。」

「咁嘅情況……」

「唔難呀可？」

容許康仔喺度作一個人身攻擊。月入5至7萬，有嘅。Banker，都應該有嘅。但會唔會鍾意你呢隻淨係睇錢做人嘅扁口扁面扁平足呢？我就覺得冇嘞！睇睇份form，Annie職業係會計文員，月入range係萬五至二萬蚊，冇樣、冇腦、冇身材仲要開口埋口講錢，可唔可以話我知搵5至7萬嘅banker點解要揀你先？

我知，感情係講夾唔夾同有冇feel，更加唔應該以貌取人，但換轉你係我吖，呢個Annie擺明想搵條水魚劏喎，你會唔會唔嬲吖？呢單生意，康仔自問唔想做亦都唔識做，唔係話我想倒公司米，而係我唔想害咗班男仔客。

康仔冒住被炒魷危機，話佢想join嘅plan已經滿額，叫佢唔使畀錢住，返屋企等我email，睇吓入唔入到event stand by名單。我相信Annie份人咁想快啲上岸唔使撈，應該會再去其他公司報名。

唔好畀康仔批中，我估Annie無論去到邊玩speed dating都肯定食白果，為咗留意住佢嘅動向，同埋要知道邊條仔咁唔長進同佢撻著，事後我特登WhatsApp咗Annie，話有更好嘅speed dating公司介紹畀佢。

先博friend維持友好關係，先可以慢慢跟進，睇你點折墮。

專欄作者簡介：
康仔
日頭返工攤抖，例牌遲到早走，收工約Friend飲酒，放假陪女玩狗。
一日冗員，一世冗員，我是康仔。

Facebook專頁：
https://www.facebook.com/mynameishonghong

發掘更多身邊的小城故事，請LIKE 蘋地Facebook Page，並設定為「搶先看」： https://fb.com/appledailyland