現時喺韓國熱播、由朴敘俊同埋朴敏英主演嘅tvN新劇《金秘書為何那樣》，除咗喺當地受歡迎，《金秘書》熱潮亦已吹到中港台，唔少劇迷都好奇到底霸道副社長最後點樣追到金秘書，而劇集亦都帶捧「雙朴」人氣急升。

而現時世界盃即在舉行中，當中今晚仲有南韓對瑞典嘅賽事，身為國民自然都會支持自己國家個隊，所以韓國各大電視台今日將會轉播有關賽事，當中三大免費台KBS、MBC及SBS都會於韓國時間今晚7時40分起轉播賽事，預計要到晚上11時才結束，而不少劇集及綜藝節目都大受影響，將會暫停播出及延遲播出。

MBC方面嘅綜藝節目《SectionTV演藝通信》確定停播，劇集《檢法男女》將於今日及明日停播，《過來抱抱我》周三停播周四如常播出；SBS嘅《油膩的Melo》亦於今明兩日停播。KBS綜藝節目《你好》確定停播，劇集《你也是人類嗎》今日則延遲一小時播出，聽日停播。

至於劇迷最關注嘅tvN劇《金秘書》好彩就唔受影響，後日及大後日照常播出第五及第六集，令唔少劇迷都大感安心。而《金秘書》喺最新嘅最具話題韓劇排行榜調查中，連續兩周奪得冠軍，亞軍及季軍就分別為《你也是人類嗎？》和《金裝律師》。

更多韓流，喺晒《娛果》
http://fb.com/appledailyent