黃翠如、唐詩詠、周志文、少爺占今日喺蘭桂坊出席活動。

黃翠如唐詩詠兩位好姊妹經常相約去吃喝玩樂，唐詩詠近期更成功拉攏黃翠如做運動，黃翠如話：「約都約咗幾年，一個人做運動冇動力，你去到gym room發現好多機械自己都冇見過，前日做咗第二次運動，依家腳好痛，原本今日想去做完一齊出席活動，但唐詩詠驚我行唔到過嚟。」唐詩詠希望黃翠如首先全身運動，目標一星期一次健身，黃翠如話：「希望練到腹肌，好似田蕊妮嗰種。」唐詩詠鼓勵：「只要諗到就做到。」原來唐詩詠游說黃翠如做運動係誘騙方式，約食飯時叫佢帶埋套運動衫，結果食飯前就一齊先去做運動。

兩姊妹會唔會一齊上美女廚房？黃翠如：「有人提議過，但我冇諗住上，私下畀佢踩同公開畀佢踩係兩回事（指男友蕭正楠）。」唐詩詠話自己冇手勢可言，但有心意。兩位女士有冇試過對方手勢？唐詩詠話：「約出嚟都難，有人唔放人，我地計劃一齊去旅行都講咗半年，希望今年成事。」黃翠如提議三人行，但唐詩詠拒做電燈膽。唐詩詠正在努力搵對象，黃翠如都會幫手做媒介紹。

周志文緋聞女友劉佩玥上美女廚房節目之後廚藝劣評，周志文話：「曾經試過moon bbq手勢，但食物最終都係浪費咗俾我笑。」兩人關係又大躍進浮面，周志文連聲否認：「唔係唔係，講食嘢之嘛。」夠唔夠膽試moon手勢？周志文用行動同言語支持：「見到阿bob生嘅都要食，我都冇得拒絕。」

精選娛聞，喺晒《娛果》
http://fb.com/appledailyent