香港教育大學（教大）今日頒授榮譽院士畀5位社會人士，表揚佢哋對教育，教大及社會作出嘅貢獻。5人中除咗有一直關注少數族裔教育問題嘅現任立法會地產界議員石禮謙，仲有前教育界議員、民主黨嘅張文光。自1991年起，除咗回歸嗰年立法局議員要「落車」，張文光一直喺立法會擔任教育界代表至2012年，對教育界嘅貢獻可以話係毋容置疑。

得獎者通常都會有個水蛇春多謝名單，張文光則趁機發表愛的宣言，指40年以嚟嘅教育同政治生涯，面對過艱苦波折，亦曾有過唔少夢想，最終可以走到咁遠，最重要係有太太相陪，話未來過多啲二人世界，會係人生最大幸福，張太聽到一定甜到漏咯。

張文光又話對於獲頒此榮譽非常榮幸，指自己多年來從事教育工作，其中一項極力推動嘅，就係香港應該要有一所教育大學，最終教院能夠升格做大學，而自己喺教大獲授榮譽院士，別具意義。

《蘋果》沙士15周年系列網站，正式登場：
https://hk.feature.appledaily.com/sars15/