蔣雅文繼續點評台灣十樣唔好:

1）台灣人特別容易一窩風
台灣容易對新事物感興趣，對舊事物比較淡忘，追求新鮮，所以喺台灣做生意比較辛苦，你要keep住客人畀新鮮感佢，不停增進自己經驗做得更加好，呢個係一個壓力，市場冇香港咁大，真係有呢個困境。

2）消費能力低
有一好冇兩好，既然選擇喺台灣生活，我會享受嗰邊比較唔使咁高壓生活費，當然相對賺嘅錢，亦喺呢個range，呢樣冇得去強求，當然希望畀屋企人更好生活，但喺台灣賺取嘅回報，未必同香港有得比。

3）台灣男仔事業心冇咁重
台灣男仔比較單純，但對好多嘢唔上心，佢哋好容易會滿足，呢樣係好事，但對男仔嚟講，事業心冇咁重，唔會好似香港男仔咁衝，所以我同老公有陰陽協調感覺，我衝得太勁，佢會拉我一把，佢太hea時，我會扯住佢走，所以台灣人同香港人喺埋一齊幾適合。

4）台灣食物味道差唔多
台灣好多好嘢食，但台灣人對台灣味非常鍾愛，就好似對民族嘅認同感，所有嘢食都好好食，但味道都係差唔多嗰種，都係甜甜哋嘅醬，但香港始終係唔同國家嘅人聚集地方，咁多元地點所以有異國菜，旅行去台灣夜市非常開心，但住喺度冇可能日日去夜市。

5）台灣媳婦要妥協
如果要做台灣媳婦，嗰邊會比香港傳統，所以要好好地考慮呢點，自己算還好，有朋友嫁去台灣唔係咁好彩，男家非常之傳統，所有習俗細節都做到足，尤其老一輩經歷過打仗年代，有好多傳統思想冇法扭轉，呢代媳婦要妥協一下。

6）台灣年青人係草莓族
所以想搵到一個真係幫得手員工冇咁容易，佢哋稱之為草莓族，外表睇落好光鮮，但一壓就扁，佢哋抗壓性唔夠，所以喺台灣咁多年，始終搵唔到同培養唔到好助手，同你差唔多年紀嘅人，冇理由使佢哋做嘢，所以成日想搵學生或剛畢業，但好多都吃唔到苦，突然會人間蒸發，約佢見工突然noshow。

7）台灣垃圾筒太少
因為畀香港寵慣咗，去到台灣要你嘅袋夠大，去keep住你嗰日嘅垃圾，因為鼓勵民族分類，基於呢樣都係環保，但尤其是女仔會唔習慣，媽咪都問我垃圾筒呢？可能行幾條街搵，呢樣真係唔方便。

8）台灣好多電單車
造成空氣冇咁好，尤其台北，一條馬路香港可能兩架車，但台灣好多電單車，每架都有死氣喉，你喺馬路上行，空氣質數真係非常之差，好多懸浮粒子，所以自己都戴口罩，唔好吸咁多廢氣。

9）冇好食嘅燒味
呢樣真係好痛苦，香港最留戀地方就係嘢食，港味真係搵唔到，台灣好多燒味舖，掛念故鄉入去食，但放入口真係失望，將我打入地獄感覺。

10）台灣女仔着重虛榮
台灣女仔比較嚮往貴婦生活，好多高級下午茶COFFEESHOP，着重上身銜頭名牌，唔知係咪自信心唔夠問題，畀我印象街上好多花枝招展女仔，但有自信唔需要咁濃妝，好多台灣女仔好靚，但武裝出嚟就將自己冚住咗，覺得好可惜。