由《我係張寶利》女星李宥利孖宋昌義主演嘅MBC新劇《捉迷藏》於上月25號首播，後日就播出第13至第16集，不過近日劇中場面卻引來爭議，當中於日前播出嘅一集中，有李宥利衝入男澡堂嘅場面，雖然喺澡堂中嘅男演員都圍上毛巾及經過打格仔處理，但仍然可見唔少男性裸體嘅場面，即時引起網民及觀眾爭議。

觀眾都到官網留言指摘劇集無視男性嘅人權，覺得咁樣播出男澡堂場面唔將男人當成人，引起唔少網民批評。對於觀眾嘅批評，製作組方面對於觀眾感到不快大感歉意，並指會虛心接受觀衆嘅批評，今後會更加慎重處理呢啲場面。

《捉迷藏》講李宥利係化妝品公司專務，事實上集團話事人係想搵佢取代被誘拐失蹤嘅孫女，亦一直唔當李宥利係人看待，李宥利喺家中冇地位，更慘被當成貨物要佢嫁畀已離婚兩次嘅富二代。做咗人妻後遇上老公間公司嘅隨行秘書宋昌義，宋昌義聽從李宥利老爺嘅指示暗中監視李宥利，點知最後卻愛上李宥利，而此時失蹤多年嘅孫女竟然仲喺世上，令到李宥利為咗生存而展開復仇。

另外，由徐玄、金正鉉主演嘅MBC《時間》，雖然經歷男主角金正鉉退出劇集嘅風波，但無礙劇集發展，《時間》於今晚播出大結局，由於噚日播出中南北韓首腦會面嘅特別新聞，所以噚日《時間》就停播，今晚將一口氣播出第29集至第32集。而徐玄與一眾演員今日就現身劇集嘅煞科宴。

更多韓流，喺晒《娛果》
http://fb.com/appledailyent