今晚大約8點幾，朱薰同老公帶埋囝囝一家三口，去到大坑一間餐廳食嘢，過咗一陣， RubberBand嘅鼓手泥鯭，同Mr.嘅Bass手Dash再到一齊食飯。其間佢哋成班人有講有笑好開心，大約食咗個半鐘就離開。

Dash步出門口，就被記者問到Mr.係咪要拆夥嘅問題，Dash話：「我要問返當事人，因為好多都係記者朋友同我講，大家出嚟傾下睇下咩事先。」佢再補充話：「我哋嚟近仲有工作，同其他隊友都有見面，大家可能覺得我哋關係好差，但係其實唔係，大家都識咗十幾年。」

Dash做完訪問後，最後一行五人上咗Dash舊款Mini Cooper離開。