股壇大隻佬、耀才證券（1428）市務總監郭思治（郭sir）鍾意玩健身就係人都知，咪以為佢淨係玩呢類陽剛味濃嘅運動，原來郭sir連詠春都識。
年過花甲嘅郭sir噚日食晏時講起，佢喺30幾年前已經拜師學詠春，佢師傅更加係大有來頭，係葉問嘅弟子陳衛匡師傅，咁佢咪應該已經係大師級？謙虛嘅郭Sir話，如果同金融界另一詠春高手、國藝娛樂（8228）主席冼國林比較，佢只係小學級數，冼師傅就係教授級咁話。

睇電影燃起功夫癮

眾所周知，冼師傅師承葉問兒子葉準，按道理，郭sir與冼師傅都係葉問嘅徒孫，二人嘅功夫點解會相差咁遠先？
郭Sir解釋話，佢後生嗰陣，學詠春只係學咗一段好短嘅時間，之後因為工作關係暫停，近年睇番《葉問》系列電影，先至挑起條根，舊年重新再學詠春。
佢仲專登搵番陳衛匡師傅，雖然陳衛匡師傅已經80幾歲，家陣唔會親自教詠春，但郭sir搵到當然另計喇。工作忙碌嘅郭sir話，𠵱家最少一個月上兩次堂，可以就再上多啲。
咪見郭sir平日講股好淡定，原來佢一練詠春就好忘形。話說有日佢自己用木人樁練詠春，點知越練越投入，唔識收力，結果沖涼嗰陣見到浴缸有血，先知道原來自己兩隻手都打到傷晒。據郭sir形容，嗰次並唔係普通皮外傷，而係傷到爆開有血有肉嗰隻，真係聽到都毛管戙。

李華華
mailto:[email protected]