董特首競選連任嘅網頁chtung.org整得七七八八，差不多可以面世，八方前晚見夜麻麻冇乜嘢做，開嚟睇睇，發覺入到喎！除咗有老董上個月嘅競選宣言、競選辦嘅新聞稿之外，重有佢嘅個人簡歷，同太座Betty一齊切蛋糕嘅合照，而每一頁嘅頂部更加放咗佢宣布連任當日，喺台上面同李嘉誠、霍英東等選委合照揮手嘅相，又有電郵可以畀市民同佢溝通。
奇怪嘅係，八方噚日返工諗住再開多次個網頁時，竟然發現「網頁製作中」。打個電話問吓競選辦，佢哋話網頁仍然測試緊，八方入到去都算好彩！記得胡官講過，候選人要登其他人嘅相喺競選宣傳物上，要得到嗰啲人同意，唔知老董同選委嗰張大堆頭合照，係咪問晒所有人都同意呢？
雖然老董網站色彩繽紛，但係反董嘅劉山青就批評老董網站係鴕鳥網站，佢唔相信阿董自己會覆電郵，又笑梁振英自命精英，唔知道原來有類似嘅網域名稱，好似chtung.com，已經畀人買咗，而chtung.org.hk重畀人攞咗去做反董網頁㖭！


E-mail：[email protected]