今屆奧斯卡最佳紀錄片由講述美國中情局叛諜斯諾登（Edward Snowden）嘅《Citizenfour》（第四公民）以大熱姿態奪得。紀錄片其中一段拍攝斯諾登二○一三年來港過程。喺香港協助斯諾登嘅人權律師文浩正因而成為片中嘅重要人物，紀錄片係原汁原味，唔會好似CCTVB嘅膠劇咁將史實刪走。
接case接到登上大銀幕、仲有做埋奧斯卡男配角，文浩正認真巴閉。從《第四公民》嘅劇照睇到，文浩正同斯諾登喺一間酒店討論事情，八方噚日搵過文浩正，佢話自己其實冇睇過套紀錄片，如果香港有得上，梗係會去捧下自己場啦。佢話，當時只係以為斯諾登只係一單細case：「我唔知呢件事咁大囉，我當係普通案件咁接。」

「唔知呢件事咁大囉」

佢憶述，斯諾登二○一三年來港時，隨同嘅仲有拍呢套紀錄片嘅導演Laura，八方翻查資料，原來Laura係受斯諾登之邀，將佢嘅經歷拍成紀錄片。片中所拍到嘅都係文浩正同斯諾登接洽初期片段，文浩正話，當佢正式接手斯諾登呢單case後，因為保密協議問題，冇得拍落去，所以何俊仁曾經話同斯諾登食Pizza、炸雞、飲汽水嘅片段都未有收錄。
文浩正話，呢套係紀錄片，所以全程都係拍攝真實過程：「因為唔係拍戲，其實我唔係好覺佢哋影緊我，因為斯諾登一嚟到酒店，所有嘢都好趕，滾水淥腳，所以我都冇留意到鏡頭拍緊我，我冇乜理佢哋。」呢套戲仲未知香港會唔會上、或者幾時上映。

李八方

mailto:[email protected]