昨日內地公佈9月份CPI，按年上漲3.6%，雖與市場預期差不多，但事實是通脹又創出年內新高，士佳曾提及人行在數據公佈前突然加息，應是意識到通脹有失控的現象。
當大家睇完其他經濟數據，又見內險股繼續上升，可能會認為中國加息周期已啟動，但歐美大行似乎仍未看得通，發表的報告意見各異，有人話加息周期已啟動，亦有人話象徵意義大過實際。筆者就認為其實連中國領導人都是摸着石頭過河，始終在全球化下，任何動作都要想想會否影響環球經濟，今次加息，實為市場帶來一個重要訊息。

中國加息顯自主

之前內地一直說CPI若升越3%已屬危險，但當真的超越了，又話已經見頂。士佳揣測其實中央一早已有加息念頭，只是想等歐美日等經濟好轉才行動，但一直未見好轉，甚至再推量化寬鬆，最後唔理得太多，決定自行加息，算是給外圍一個警號，顯示自己不一定要跟歐美日步伐。
大市現階段似想回調又唔調，筆者會繼續一邊揸股票，一邊揸認沽期權，揸認沽期權預咗輸晒，只係博大市會補回月線圖裂口，若然唔補繼續升，股票的利潤應比蝕的多，就算真的回補，揸住優質股應該跌極有限。士佳積極找圖表有勢又有基本因素支持的優質股，中國全通（633）值得望多兩眼。
全通主要為政府部門、公用事業及商業機構，提供綜合資訊通訊應用解決方案及應用服務，業務包括無線數據通訊、衞星通訊及呼叫中心等，隨着內地3G普及及對災害預報系統的需求增加，全通上半年純利按年增長63.02%，現價預測市盈率約12倍，以行業前景絕對稱不上貴，現價買入，博有3成升幅，跌穿1.70元止蝕。
張士佳
寶來證券（香港）董事　投資服務部
筆者及客戶持有中國全通
mailto:[email protected]