加稅壓力大，即時打窒樓市購買力，要預多啲錢交稅，供樓條數又唔可以減少，負擔一定係大咗。正所謂一闊三大，所以大部份有能力或啱啱夠錢置業嘅人士，都可能會停停步諗諗先。
美聯早兩日做咗個電話調查，訪問一百零七名客戶，結果五成悲觀看待樓市前景，覺得平穩嘅佔兩成左右，其他都係無意見，而且無一個認為樂觀。近排咁多個調查訪問，最悲嘅相信係呢個。
重唔止呀，認為樓價會跌嘅，佔七成一，其餘兩成九就無意見或者認為無升跌，同樣地，完全冇人覺得樓價會起。
美聯加咗個注腳，佢話咁嘅結果，顯示舊年政府硬銷孫九招挽救樓市，市場信心好似好番啲，點知一個財政預算案就完全摧毀一切，樓價跌幅只會進一步加劇。
美聯主席黃建業指出，孫九招對樓市嘅短期刺激已經耗盡，減少供應嘅長遠效果，又未到時候浮現，樓市仍然內傷，財案竟然大幅加稅，有如在傷口上灑鹽。佢建議政府應該做番啲實質嘢，例如放寬七成按揭，刺激二手交投，恢復市民入市信心。至於點解要救二手樓？黃主席話，二手樓俾一手市場打到毫無還手之力，應該先幫助，樓市發展至正常。