究竟特首林鄭月娥係咪活喺平行時空？睇佢行蹤就知道。香港嘅修例風波未搞掂，林鄭就掛住搞大灣區，今日朝早會去澳門出席粵港澳大灣區發展建設嘅文化使命國際論壇開幕式，下晝返港。日前因為拒絕重啟政改被人鬧爆嘅政制及內地事務局局長聶德權同埋特首辦主任陳國基都會隨行。其實反修例抗爭青年中，幾多人關注大灣區？與其嘥心機搞呢啲中央任務，不如諗吓點令香港回復昔日狀況好過。

形容香港「內憂外患」

林鄭過大海前，噚日亦喺冇通知傳媒情況下到解放軍駐港部隊粉嶺新圍軍營出席香港大學生軍事生活體驗營結業禮，近期出過fake news嘅全國政協副主席梁振英都有現身。林鄭致辭時形容香港正處內憂外患，經濟下行風險好大，呼籲愛護和平嘅人為大家嘅家而努力，又聲稱會耐心聆聽年輕人心聲，又叫佢哋秉持軍人精神為國家貢獻。對於喺香港各區食催淚彈嘅年輕示威者嚟講，呢啲說話真係難聽過粗口。

睇返特區政府策略，似乎想當過去兩個月冇事發生，除咗林鄭開始鬼祟落區兼內訪，其他局長再用網誌sell政績，例如財庫局局長劉怡翔談及點樣完善香港嘅打擊洗錢制度，發展局局長黃偉綸就介紹落馬洲河套地區發展前期工程嘅特色同進度。唔提等於不存在？港人真係當災。