民主黨中委會早前決定，今年3月嘅黨慶唔會邀請特首林鄭月娥、律政司司長鄭若驊同埋立法會主席梁君彥，事件原來有餘波，有民主黨「老鴿」認為以往民主黨黨慶拒絕邀請某位官員，「紅線」劃喺該黨有冇叫過該位官員下台，例如前特首梁振英、前發展局局長陳茂波同埋前教育局局長吳克儉，三位前官員由於踩中該黨嘅「下台紅線」，未獲邀出席黨慶都好合理。

但睇返林鄭上台後，民主黨至今都仲未叫佢落台，但黨中委會居然作出不邀請林鄭嘅決定，八方聽聞呢個做法令部份民主黨嘅老鴿有微言，其中一直係籌款委員會主將的李華明，就決定退出籌款委員會，佢去年上台唱歌成功「揼林鄭心口」捐出3萬元，當然大家更記得之後嗰場「大和解」風波。八方向李華明查詢，佢證實退出咗籌委會，解釋民主黨做事，立場向來清晰，唔能夠將條「邀請官員」嘅線亂劃，既然意見不一就退出。

八方聽聞，有民主黨員都擔心，若然唔邀請林鄭出席，其他娥班子高官收到民主黨嘅黨慶邀請，夠唔夠膽僭越阿姐出席？而林鄭同敵我分明嘅梁振英肯定好唔同，絕對唔會好似689咁，開口要求問責官員不能出席民主黨黨慶，所以問題只在於其他高官有冇膽？一旦「零高官」出席，或多或少對籌款成績都有影響，但有年輕民主黨人話，林鄭對進行議會抗爭嘅林卓廷同尹兆堅作政治檢控，邀請佢嚟嘻嘻哈哈真係唔多適合。