適逢今日係白色情人節，玄學家麥玲玲喺尖沙嘴出席活動，宣佈推出命理交友app，呢個app提供八字交友合拍程度，預測每日運程兼催旺人緣，同場仲有王友良。

太陽娛樂老闆周焯華（洗米華）上年被影到醉攬松岡李那，早前洗米華曾笑稱當晚係攬松岡媽（新聞連結： http://bit.ly/2IpZ6sb ），玲玲師傳即場測試佢哋嘅合拍度，點知洗米華同松岡嘅合拍度有70幾%，但同松岡媽就只有60幾%。講到玲玲師傳將兩人嘅緋聞擺上枱，佢話：「華哥好幽默、好玩得，我估佢係醉咗。」

而正式進軍IT界嘅玲玲師傅，以真實英文名Gladys及出生日期開戶口，佢笑住表示：「有啲後悔，以我呢個年紀，都冇乜人瀏覽，但我老公就係咁睇靚女，佢話同我有79點幾%合拍度，但同另一個靚女就有83%，我想block咗佢。」王友良透露暑假期間，玲玲師傅會喺日本舉行占算大會，屆時會宣傳呢個app嘅日文版。

精選娛聞，喺晒《娛果》
http://fb.com/appledailyent