賭王何鴻燊子女眾多，當中26歲的三房何超蓮被封為最索千金，傳媒圍繞她的新聞都是戀事多，其實貼近她近一年的生活，不難發現焦點已轉去她與朋友成立的慈善組織Smile with us HK，善用她在Instagram同微博「網紅」威力，已有成1500個義工，現正計劃向政府申請註冊成慈善團體。

《蘋果》日前的某星期日就與超蓮做專訪，跟她與20位Smile with us HK義工們去海洋公園做義工，由於她忙於家族在澳洲柏斯的酒店翻新項目，加上她之前剛由新西蘭完成另一個慈善項目，堆積工作要她早上先返公司開會，一天的行程都排得密集。

1100
超蓮在布力徑住所出發，第一站就返上環辦公室，因為要傾6號，會在香港宣佈柏斯洲際酒店翻新開幕的記招，由邀請名單、時間流程、地點、保安人數安排等。

1330
開完會於公司出發到海洋公園，以Smile with us HK義工身份，出席南區區議會旅遊文化節。

1400
抵達海洋公園，與義工們瞭解義工職責。原來當日外籍導師以活動教學教小朋友英文，超蓮與義工做協力角色，帶小朋友參觀熊貓館影selfie及香港老街拍video，過程中鼓勵小朋友以英文溝通。

1700
完成義工工作後，超蓮就去灣仔街頭買雞蛋仔、咖喱魚蛋等小食醫肚。之後返家休息，夜晚出動，帶台灣朋友遊香港。

超蓮所搞的Smile with us HK的活動，性質大都是「貼地」接近群眾，如老人院探訪、情人節派玫瑰、去深水埗派飯盒、幫基層人士搬屋、書展派扇、街頭派波板糖、曲奇等，未必可以即刻解決物質上的困難，但她希望藉此散發正能量搏香港人一笑。家庭條件優厚，行出來做善事，少不免被外界標籤出錢便可，超蓮就有另一番見解：「啲人會覺得我哋富二代好有錢，唔憂柴唔憂米，不如去上遊艇、暑假去玩。其實我哋呢群人都好有心，希望幫到香港人，亦唔係用錢去『撻』人，用個心去同人接觸。當然捐錢係幫到好多人，但係有時幫人唔係一定係用錢，我哋想傳達慈善唔一定係捐錢，有人支持佢同關心佢都係。人與人之間嘅溝通，香港人就係缺乏呢樣嘢，氣氛唔係十分開心。」

由細到大，超蓮媽媽都灌輸女兒幫人的左右銘「越幫越忙就唔好去做」：「佢係一個護士，覺得做義工係要幫到人先去做，唔好越幫越忙，要人照顧埋你就寧願你唔好做，好似四川地震，我嗰時仲喺英國讀書，想做義工幫手，佢話我:「『你有專業資格咩？你又係越幫越忙，不如你諗一個你做到又幫到。』於是我話想捐錢，佢話『你叫我捐錢，家係你想捐錢，有乜理由係你叫我捐錢？』」最後，她就提議與弟弟由倫敦返港坐頭等機票轉坐經濟倉，將慳出的錢捐作慈善用途。

令超蓮有決心想幫助別人，源於早前去尼泊爾探訪，體會當地失去居所災民仍然樂觀面對，相反物質條件好的香港人就不快樂：「香港人唔會笑，唔會對住一個陌生人好友善同笑，唔開心排名就係好前，開心、快樂、滿足係好後排名。」

情人節派玫瑰花是Smile with us HK的第一個活動，但超蓮與義工們食盡檸檸，途人以有不同理由拒絕收一支花，體驗香港人的冷漠，不過亦有感動的故事，曾經幫過一個受到家暴的女士搬屋：「佢係一個有三個女、住劏房單親媽媽，被老公打到入咗醫院，係醫院昏迷嗰陣，老公拎咗佢張信用卡碌爆，但佢好堅強唔想社會上幫。婦女聯會幫佢轉咗間公屋，但佢連搬屋費用都拎唔出，我哋就幫佢出搬屋費用，連同鋪地板、油牆，幫佢整好間屋。平時接觸唔到呢個層面嘅人，亦唔會有人同我講佢哋嘅難處，我覺得唔係我哋去幫佢，而係佢教緊我哋呢啲年輕人，我哋有幾幸福。」

上月，超蓮更拉埋老友G.E.M.落水，在銅記街頭搞了一個「微笑女戰士」比賽，當中如鬥快搵人捐食物，拍片在社交平台儲Like籌款，最後超蓮輸了，要接受譚詠麟劃花臉大懲罰，她表示：「其實錢我哋搵咗啲大機構，籌到200萬，同校長做呢個騷，係想吸晴啲，吸多啲Like，等社會大眾覺得好笑啲。」籌得的善款最後捐了去聖公會去支援有自閉症、讀寫障礙、智障、殘疾，聽障小朋友，她表示：「呢啲小朋友要攞到政府資助，過程係好耐，講緊係要三、四年，但6歲之前係黃金醫療期，可能就咁過晒，所以我哋就同聖公會整一個fund出嚟，係專幫小朋友，我哋有一個宗旨，唔可以有任何行政費用，行政費用我哋自己畀，我哋畀嘅錢，一分一毫都係畀小朋友到醫病。」

行出社會做慈善，父母給她的意見就是放手，超蓮表示：「媽咪盡量放手，叫我唔好諗住靠屋企，要我stand your own feet，自己都企唔穩，要身邊啲人捧住你，咁就唔係叫企，同埋要唔好影響工作，如果兼顧唔到就本末倒置。而爸爸好細嗰會叫我哋去啲窮嘅地方，睇下點生活，明白自己比人幸福幾多。」

採訪：梁錦雯、譚倩宜
攝影：林德雄
攝錄：吉吉、馮峰
協力：林賓尼

更多娛聞，喺晒《娛果》
http://fb.com/appledailyent