洗米華．Mandy．洗米嫂呢段感情關係，原來差唔多接近3年喇。呢段時間入面，洗米華來回全球四圍飛，開工又有，陪兩位情人都有，飛行里數加埋，應該都夠圍繞地球幾個圈。

喺14年9月，有報道指Mandy陪洗米華坐頭等機位飛紐約開工，同年11月就喺澳門化身人肉坐墊，俾洗米華坐住玩百家樂。洗米華喺14年底同完洗米嫂去泰國旅行，提早離隊去新加坡會合Mandy。

15年就最犀利，洗米華同Mandy好多好多次被影到去旅行。先係4月蜜遊澀谷，5月洗米華喺倫敦陪Mandy分娩，6月又被目擊於新加坡着情侶裝血拼，8月Mandy喺韓國服侍洗米華用餐，9月喺巴塞隆拿W Hotel酒店着運動裝跑步，10月就返咗馬來西亞，12月底終於返香港，仲成就咗一幕「世紀一拖」。

16年都係旅行時間，先後去過泰國布吉、北海道滑雪勝地二世古、又喺韓國仁川機場蒲頭，4月返到倫敦睇BB衫，到8月Mandy第二胎「華種」出世，兩人就以運動look企埋公園一角煲煙。

嚟到今年，松岡介入呢段複雜感情，有傳Mandy嬲豬，洗米華終於喺7月被發現飛到倫敦，於一間中餐館內同Mandy食飯有傾有講，上個月中兩人行街，Mandy仲疑似再度懷孕，有咗5個月BB。