噚晚「勁歌金曲頒獎禮」悶爆都係意料中事，雖然之前一班TVB高層話歡迎其他唱片公司嘅歌手上嚟，但其實都封殺咗好幾年，o依家先上返嚟都冇咩意思，所以今晚依然係英皇同星夢幫嘅頒獎禮。

無綫捧吳若希首《越難越愛》捧到出晒面，不過呢首歌的確今年嚟講係最洗腦嘅一首，一響起前奏個腦已經loop緊副歌，所以今晚《越難越愛》拎到「金曲金獎」，點都有代表性過之前林峯嘅《chok》嘅。吳若希上台口震震，最後仲講到喊埋，佢仲特別多謝Kaysend短訊叫佢唔好驚，台下嘅Kay都好似感動到眼濕濕咁。

不過今晚英皇同星夢幫玩晒，網民話淨係睇呢個頒獎禮，以為個樂壇得兩班人，今晚啲歌曲獎，除咗英皇嘅容祖兒、張敬軒、泳兒、洪卓立，同TVBFriend咗嘅謝安琪，之後就一堆星夢幫，好似鄭俊弘、林欣彤、許廷鏗同吳若希拎晒咁滯。