左丁山賭波比較少以意甲為投注對象，你知啦，意大利以黑手黨著名，陰謀、操控嘅傳統好深厚，翻查紀錄，二十年前已經揭發過打假波事件，之後不斷傳出醜聞，所以賭意甲球賽，潛在風險係高過其他聯賽。左丁山冇陶傑咁樣「崇英親美愛法媚日」，但對英國佬啲體育傳統比較尊敬，認為英超聯打假波嘅機會低好多，係適當嘅下注對象。
現今唔少人賭波唔賭馬，上星期六到馬場，只見每場投注疏落，入場馬迷少（一萬九千一百六十八人），左丁山十二點半入場時，火車站下面嘅的士站竟然空無一人，一架的士都冇，自己睇見都替馬會傷神。尊貴的立法會議員鄭家富得把口話博彩稅改革會鼓勵賭風，其實佢身為新界東議員，都唔知有冇入過沙田馬場落注，如果親中嘅亞洲電視肯邀請鄭家富議員入場觀看亞視盃（上星期六），見到亞視盃賽日場面冷淡，鄭議員或者會多啲了解，馬場賭風早已趨冷淡，博彩稅改革只係挽救投注額啫，點會「鼓吹、鼓勵賭風」吖。鄭議員，請你紆尊降貴，移玉步入馬場行吓，毛澤東話：「有調查至有發言權呀！」
資深馬迷K近來入少咗馬場，星期六晚打電話問左丁山應該買利物浦還是韋斯咸，於是順便問佢點解少入馬場，馬迷K話：「一個星期五日，都冇時間湊個仔，卒之發覺兩仔爺嘅最親熱最多嘢傾嘅時間就係一齊睇電視轉播英超聯！十五歲嘅乖仔見我買馬，就會話阿爸唔好賭咁多啦。但一齊睇波之時，佢竟然好肉緊咁問：阿爸你買邊隊。於是我𠵱家賭馬少咗，賭波多咗，親子吖嘛！」