早排六嬸方逸華去完電視廣播股東會之後，講咗句六叔「考慮緊」退任TVB主席，各大傳媒即廣泛報道，證券商亦不敢怠慢，即刻跟進，若果要喺幾份「研究報告」中，揀最好睇嗰份，一定非里昂莫屬！
TVB賣盤呢單嘢，里昂一向係跟得最貼嘅券商，唔理市場或管理層傳咩講咩，佢哋都有自己諗法。好似六嬸話明，老公只係「諗緊」退休，𠵱家冇人傾緊買TVB，但里昂都繼續認為，六叔「一定」退休，TVB「賣硬」。所以，最新一份研究報告，係講「Passingonthegoldenbaton（接力棒）」，意思指六叔要交出黃金棒，里昂加埋插圖話你知邊個接──佢哋認為係六嬸！

估目標價66蚊

不過，里昂又話，TVB仍然係market裏面，最有吸引力嘅購併目標，尤其𠵱家全球媒體購併熱，有番咁上下嘅都身價非凡，例如賣緊盤嘅DowJones同Reuters，分別估值50億美金同埋87億英鎊。過去12個月，做得成嘅媒體買賣，平均都講緊28倍PE。
由於TVB基礎因素良好，加埋喺祖國充滿機遇，更加有理由要揀TVB！里昂set咗TVB嘅目標價係66蚊。呢頭吹到行話賣，轉頭又話六嬸接棒……咁投資者到底係因為六嬸接棒而買入，又或者係因為可能賣得成，而去吸納TVB股份呢？抑或唔理乜嘢理由，總之叫你買。
[email protected]