韓劇《巴黎戀人》36歲男星李東健，本月初承認跟細13年嘅女團T-ara成員智妍分手，表示兩人工作太忙聚少離多，已於去年12月分手，決定做返前後輩。不過爆出「分訊」唔夠一個月，今日就有報道指李東健同34歲女星趙胤熙因合作KBS劇集《月桂樹西裝店的紳士們》而戲假情真。

據報道指李東健及趙胤熙喺劇中飾演從相愛到結婚嘅幸福夫妻，拍攝期間對對方產生好感，兩人之間曖昧氛圍就連工作人員都感覺到。雖然李東健及趙胤熙互生好感，但對於拍拖一事依然好小心，特別係因為月初李東健先爆出同智妍分手嘅消息，李東健擔心外界猜測係趙胤熙介入佢同智妍嘅感情。

隨後雙方都承認戀情，李東健方面強調佢同智妍於去年12月已經分手，係結束上一段感情先對趙胤熙有好感，極力維護女友。而趙胤熙方面亦指兩人啱啱開始大概一星期，希望外界畀啲空間兩人。雖然李東健及趙胤熙都已到適婚年齡，不過兩人同時表示只係剛開始，談婚論嫁嘅地步仍言之尚早。