馬清儀於本月7日在嘉諾撒醫院離世，終年64歲。她是首屆健美小姐冠軍，與她同屆參選的梅小惠，形容她是一位好文靜和懂得照顧別人的大姐姐。

梅小惠今日接受《蘋果》電話訪問時說：「好榮幸當年同佢成為一組，我哋初賽有40人，5人一組，分咗8組，當時佢教咗我好多嘢，喺我心中係大姐姐。」之後兩人都有幫無綫拍劇集，但由於戲路不同，所以很少機會碰頭，小惠說：「之後大家冇乜聯絡，公司有時拍嘢都會喺公司見到面。印象中我哋合作過《娛樂插班生》，但場口都唔多，喺我心目中，佢係一個好溫文同好有修養嘅人，喺公司等埋位都好文靜同好take care人。」

對於馬清儀離世消息，小惠都覺得好震驚，她百般感慨謂：「但人生就係咁，當然希望佢屋企人可以安然渡過難關，佢係天堂亦可以得到快樂。」有傳當年馬清儀是內定冠軍，小惠說﹕：「佢由始至終係我心目中，係一個絕對應該得到冠軍嘅人。」