【一跳留名】「天使」兼任教練發掘新血
蘋果日報 2020/03/11 00:30
體操黃曉盈發掘一跳留名平衝木發掘新血
年初馬鞍山體育館上演的體操賽，公開組對手看上去不過是在學青年，如此更顯黃曉盈(左六)成熟。
急流未有勇退，重傷不甘離去，但年齡也是黃曉盈不能逆轉的事實，兜兜轉轉又回到老問題，「以前我有段時間真係有啲介意，好似特別我一直喺度練，見到好多批運動員入，又有好多都走咗，但係我依然仲喺度。」
2012年她與石偉雄雙雙入奧，八年後石偉雄大熟大勇，即將迎來第二次奧運，較他年長的戰友黃曉盈無緣奧運，但她仍然在隊中，她堅持的原因絕不單為證明自己能勝過傷患，現實是，港隊青黃不接，天使退下，始終未有另一天使頂上，「我自己再上到頒獎台都開心嘅，正常嘅flow（進程）係希望下一浪可以冚過我。」傷患一方面逼使黃曉盈稍微退居幕後，另一方面她有機會兼任教練，指導下一代成長，「港隊中係有一個好大嘅gap（斷層），但我見到係有起色嘅，特別近幾年自己冇以前咁樣淨係追個人成績，又有機會指導隊友，睇番啲隊友係真係有天資。」近年師妹吳恩言和陳芷芯接連出戰亞運和世錦賽，黃曉盈率軍參戰團體賽的目標也許又更近一步，起碼外界在石偉雄、吳翹充、黃曉盈以外，能再記下其他名字。黃曉盈怕悶，體操年復年日復日重複動作，但這也教曉黃曉盈的一課：世事從不一蹴而就，「有啲嘢係要你係要經歷過程，呢樣唔會係有捷徑，體操係教咗我呢樣嘢，冇咁大隻蛤乸隨街跳。」
記者﹕洪量丰
攝影﹕王子俊
黃曉盈現時兼任港隊助教，希望能培育明日之星，長江後浪推前浪。