傳統零售區舖位,租金售價雙雙升到「天價」水平,買賣熱潮開始擴散至外圍地區,北角係今期焦點,蘭西剛剛報道過,大鴻輝以八千六百萬,賣咗北角彩福海鮮酒家舖位,同區另一個舖位,業主即趁勢放售,心目中價錢要五千萬,每呎三千七百蚊。
中原陳耀明話,個舖係英皇道三九○至三九四號,亞洲大廈部份地下、一樓同二樓,地舖六百呎,樓上共一萬二千八百呎。截標日期為本月三十號。
個舖最特別係附連長期租約,由「客家人飯莊」以每月二十萬零五百蚊,承租至○九年十月,而生約部份重可以延至二○一二年。以業主意向價錢計算,租金回報率有四厘八,都有吸引力。呢類鐵約舖位,較為少見有人放售。
聽講,業主一月用四千一百五十萬買入,若果成功賣出,可以賺成八百五十萬,換句話,短短幾個禮拜,件貨升值兩成。
炒家重臨錦綉
上個月二手成交非常暢旺,美記潘皜民話,元朗錦綉花園有六十宗成交,創九七後單月新高,一半係投資客。
區內一個老牌投資者,亦重出江湖,上個月斥資一千二百萬,買咗四間屋短炒,成交期三至五個月,諗住升到三成就賣。
潘皜民話,之前買入錦綉嘅炒家,上個月都趁市道暢旺出貨獲利。其中M段單號屋,一千一百幾呎,剛以二百八十幾萬摸出,兩個月賺到十八萬。
潘皜民重話,呎價都比一月升咗五個巴仙,平均三千二百幾。佢預期,今個月呎價應該有機會再升半成。