五月天個唱門票今日開售，有部份Cityline嘅售票站死咗server，由於要統一延遲開售，所有售票渠道 (網上、電話、售票處、APPS)將順延至早上10點半再開售，之後安排佢哋入內，原來仲要排隊等緊，等咗個半鐘左右，有兩位南亞裔人士有事先走，起初喺尖沙嘴通利琴行排「頭位」買五月天門票嗰堆外籍人士亦不見蹤影，可能喺後門走咗，拖到中午12點45分市民先正式陸續入去買飛。

點知去到下午1點22分左右，位於旺角、亞博及尖沙嘴售票站都死機，出現「系統繁忙中」，網上又要重試，亞博工作人員則稱售票係Cityline負責，亞博工作人員只係幫手撳制。

至於「死機」一事，尖沙嘴通利現場嘅員工話：「唔會有發言人，唔會有人回應。」之後有一位通利職員行出嚟，現場記者問佢有冇人投訴排隊，佢話公司會處理。被追問如何處理、係唔係安排失當、賣咗幾多，呢位通利職員語氣溫和表示：「個啲到時再講啦。我哋公司會處理，未知點處理。我要搞掂條隊先。」佢又承認一度壞機：「啱啱壞咗，唔知幾點壞。唔知有幾多個人買到，係有人買咗嘅。」

《蘋果》曾致電去金馬倫道嘅通利查詢，接電話嘅職員態度尚好，記者以購票樂迷身份查問，究竟點先可以買到五月天嘅演唱會門票，一位接電話嘅女職員話：「一係上網，一係過嚟排隊。（我朋友嚟咗喎，但打尖都派晒籌俾佢哋！）咁首先問我呢邊，我唔清楚出面乜情況，但問我點買飛，就有三個途徑，一係過嚟買，一係上網，一係打電話。」

當記者話佢哋個網根本冇辦法上到，女職員窒一窒，然後話：「我唔清楚乜問題，可能要打去Cityline問，我哋都賣緊飛，但個server都好慢，我都明白買唔到飛會擔心，但我哋都冇辦法解決，唔好意思。」

精選娛聞，喺晒《娛果》
http://fb.com/appledailyent