日本影后宮澤理惠驚爆再婚嫁V6成員森田剛，佢早前已帶同前夫所生嘅囡囡搬到新居組織新家庭。下月滿45歲嘅宮澤理惠為日荷混血兒，11歲已擔任雜誌《Seventeen》嘅模特兒，小學六年級拍廣告即備受注目，十幾歲已走紅藝能界，而最經典係佢曾全裸寫真集《Santa Fe》，銷量高達155萬本，當時真係轟動整個亞洲。

宮澤理惠感情生活亦十分豐富，佢於1992年同前名貴花田嘅前相撲手貴乃花高調訂婚，不過兩個月後男方取消婚約，理惠因被悔婚而大受打擊，一度患上厭食症跌至人生谷底，貴乃花之後就娶女主播河野景子為妻育有三個子女。理惠再婚成為近期當地熱門新聞，咁啱貴乃花近日都成為新聞人物，事關其20歲愛徒貴公俊涉休息室打人，貴公俊已被停賽，貴乃花今日現身被大批傳媒追訪，唔係向佢追問宮澤理惠再婚，而係向佢求證貴公俊打人一事，貴乃花一臉愁容亦表現無奈，指貴公俊採用暴力係事實，並作出道歉。

精選娛聞，喺晒《娛果》
http://fb.com/appledailyent