賴：賴維銘
記：記者吳文輝

記：自從你掛靴之後，黎海榮就升為大師兄，而佢上星期已恢復操馬，你有無兩句同佢講吓呀？

賴：記得黎海榮剛剛加入馬圈的時候，已覺得佢鬥志十分好，果然亦得到好多支持。我唔太清楚佢嘅受傷情況，不過有啲傷勢看似輕微，但可能係騎馬時嘅發力位置，要很小心處理才可，始終自己對自己身體情況最清楚，希望佢來季重上賽場，可以繼續有好成績。

記：今期（23日）第二場四班草地2000米嘅「可愛寶」，以往你騎過多次但成績一般，你有無特別評價？

賴：以前我騎「可愛寶」表現欠奉，因為差不多次次都是在三班出賽，此駒質素非高，於四班才有較大機會爭勝，不過牠尚算忠心，狀態好時，每次騎落都畀到應有反應，如今評分已減去不少。
同場「福多寶」雖然兩捷氣勢強，但「可愛寶」跑拿手的2000米且用到潘頓抽1檔，牌面唔會輸蝕，實在需要重視。

記：今期兩場三級賽出馬都唔滿額，比較而言第八場1800米精英碟出馬較多，形勢亦較微妙，你有甚麼睇法？

賴：今場可以博吓應是冷門的「馬克羅斯」。騎師放馬最緊要令馬匹舒服，如果有其他馬畀壓力，當然會放得冇咁順。
「馬克羅斯」之前經常對住「歡樂之光」，就算搶出都未必舒服，今場既無「歡樂之光」，三級賽對手亦差一截，段速相信會有唔同，假如放得順暢，發揮出應有能耐，喺呢組唔易搵到對手，一切視乎臨場際遇而定。

-----------------------------
7月4日起 《蘋果動新聞》只限升級壹會員閱覽
繼續撐蘋果！
https://hk.adai.ly/e/iIRREmuwDX